D Luusbuebe

2016 hät euis am Openair Wipkinge (dä Timo, Kerim und Tobias mached döt mit) d’Chinderband abgseit, obwohl ufem Flyer scho es Chinderkonzert agseit gsii isch. Aber statt truurig d’Chöpf hänge z’lah hämmer churzerhand entschiede e eigeni Chinderband z’gründe.
Das isch d’Geburtsstund vo de Luusbuebe gsii. Eis Jahr spöter hät euis dä Filip, bekannt für siis virtuose Gitarrespiel, kompletiert und s’musikalische Niveau vo de Band uf es next Level ufgeglupft. Mehreri chlini und grösseri Konzert für Gross und Chli sind gfolgt und 2019 simmer bim Jeannot Steck (dä hät mal mit euisne grosse Vorbilder Schtärneföifi zämegschaffed!) im Studio gsii und händ euisi ersti EP ufgnoh. Das isch au de Momänt gsii, wo dä Kerim gmerkt hät, dass er lieber hinter de Kulisse isch, statt sälber uf de Bühni z'stah. Er bliibt aber für immer en Luusbueb und haltet euisi Konzert sit dem mit de Kamera fescht.
Wills so schön gsii isch bim Jeannot, simmer im Winter 2022 wieder zu ihm is Studio und händ es ganzes Album ufgnoh, das im Früehsummer usecho wird.
Mir mached Chinderlieder doch au die Grosse döfed euisi musig lose. Euis isch wichtig, dass euisi Lieder au Themene aspräched wo euis wichtig sind und mir sind fest devo überzügt, dass mer Chinder vill meh cha zuetraue als es villi Erwachseni mached. Mir findet, dass alli Chinder und Erwachsene en Platz a euisne Konzert und i euisere Gsellschaft händ egal wies usgsehnd, oder woher sie chömmed. Meitli halte mer für mindestens so schlau wie Buebe und d’Summerferie finde mer die schönschti ziit vom Jahr.
Ah ja, schaffe dümmer übrigens nöd so gern!